Македонската Православна Црква Св.Никола-Престон, Мелбурн, Австралија, од нејзино основање до денес, како духовна мајка ги собира верните чеда, кои и оваа година со подготовка, Божикен пост, покајание и исповед го пречекаа Раѓањето Христово.
На Бадник беше одслужена света богослужба и од МПЦО „Свети Никола“ на децата им беа поделени коледарски подароци (пакетчиња).
Следниот ден, во храмот, верниците фамилијарно присуствуваа на празничната Божикна Света Литургија, на која се причестија со Св.Тајни, го слушнаа божикното слово на Митрополитот Преспанско-пелагониски и Администратор Австралиски и Новозелански г-дин Петар, кој ги поздрави со христијанскиот поздрав Христос се роди! На кој поздрав отпоздравија со: Навистина се Роди!
